I pua mai tēnei villanelle i tētahi o ngā wānanga o ‘Ruri Rongoā’, he kaupapa toikupu e whakahaerehia ana e Hinemoana Baker me te rōpū o Mana Tipua.
He whakapapa tō te koruru arero-rua,
nā ngā atua ia i whakaputa mai ki te ao,
kia ngau, kia horo, kia rongo i ngā hua.
He mea māori te taharuatanga nei, nō te ao o mua,
he rākau taketake i tipu mai ai i te wao.
He whakapapa tō te koruru arero-rua.
Hei whakarākei i te whare tāpua,
he mea āta tārai e te ringa whao,
kia ngau, kia horo, kia rongo i ngā hua.
Ko hononga te reo o arero tuatahi, ko hōkaka te reo o tuarua,
he rerekē ā rāua waiata, haka, karanga, pao.
He whakapapa tō te koruru arero-rua.
He tohu oranga, pēnei i te ua,
he taunga māramatanga, pēnei i te mao.
Kia ngau, kia horo, kia rongo i ngā hua.
Ahakoa ngā whakaaro-iti, e kore e taea te tua,
nōhea hoki e tarea te whakahuri tōna ngao.
He whakapapa tō te koruru arero-rua,
kia ngau, kia horo, kia rongo i ngā hua.
He mea tito hei whakahokinga whakaaro ki Taramainuku nā Marama Salsano.
